Skontra ye una de les bandes ganadores del EHrZ, concursu entamáu pol festival Euskal Herria Zuzenean pa sofitar y espardir la creación musical de les cultures minorizaes. El grupu punk-folk va representar a Asturies tocando nel festival y apaeciendo nun recopilatoriu xunto a otres bandes que’l xuráu escoyó.
El conciertu de Skontra va ser el próximu 28 de xunu a les 15.00 hores en Lekorne, localidá onde se celebra’l EHZ, principal festival euskaldun d’Iparralde (País Vascu francés) qu’axunta cada añu a nomes referenciales de la música vasca y internacional. La compilación colos 20 grupos ganadores del concursu, va espublizase al traviés d’Internet el 15 de mayu.
La Tarrancha
Amás de Skontra, La Tarrancha foi l’otru grupu asturianu participante nel concursu. Pesie a algamar un segundu puestu na votación popular (1/3 del xuráu), nun superó los votos del xuráu formáu polos músicos Fermin Muguruza (Kortatu, Negu Gorriak…), Igor Otsoa (Oreka TX) y Jurgi Erkiza (Willis Drummond) y pola organización del festival.
La única representación asturiana va tar a manes del conciertu de Skontra y d’un puestín de materiales que va poner Ixuxú Asturies-Euskal Herria elkartea el domingu 29, dientro del mercáu de colectivos qu’entama’l EHZ.
Ixuxú. Asturies-Euskal Herria elkartea 